AGAMES 討論區

標題: 投資小貼士精華集 [打印本頁]

作者: dlalden 時間: 2008-11-1 12:28:42 標題: 投資小貼士精華集

小弟由於見到有些問題經常出現，故小弟撰寫投資小貼士系列，希望可以以小弟有限既知識同各位探討各問題，如有錯誤，可PM小弟指正；此外，亦歡迎各版友提供題目，一起探討。

大家咁有心睇投資小貼士，第一樣野要知就係股票每手交易單位既英文量詞係LOT，唔係HAND，大家請留意

投資小貼士目錄
投資小貼士1  --轉手紙用途
投資小貼士2  --寄失股票及退票點算
投資小貼士3  --如何用英文寫一張正確支票
投資小貼士4  --實物股票如何轉名
投資小貼士5  --如何看現貨即時報價系統
投資小貼士6  --點定開市價
投資小貼士7  --大戶動向
投資小貼士8  --碎股買賣
投資小貼士9  --股價細談
投資小貼士10--走勢陷阱
投資小貼士11--如何看期貨即時報價系統
投資小貼士12--如何看公司業績
投資小貼士13--好友與淡友
投資小貼士14--認購新股
投資小貼士15--傳媒操控下的投資市場
投資小貼士16--點定收市價

最近小弟用網上搜尋器打本人投資小貼士等字眼，發現有其他論壇版友轉載本人的小貼士，但請各位版友如要轉載，請quote出處，以尊重原創文章。

係金融財經、投資版區，有幾張貼提供好多有用資訊，我想係度介紹下﹕
世界各地股市交易時間表
http://www.agames.com.hk/viewthread.php?tid=11939&extra=page%3D1

作者: dlalden 時間: 2008-11-1 12:31:03

投資小貼士1--轉手紙用途

如用白表申請新股，閣下是會收到實物股票，實物股票分兩種﹕

第一種是無論多少手都發一張股票，這是最常見的。如要存倉，只需要在轉讓人姓名上簽署就可以。

第二種是1手1張股票，2手2張，如此類推。如抽中多於一手，存倉時在各張股票轉讓人姓名上簽署，銀行便會當你個別存倉，要各收$5元手續費，浪費金錢。這情況在汽車股最常見。(例子﹕中航科工；東風汽車等)

此時轉手紙便可產生作用，大家只要在轉手紙的轉讓人姓名上簽署(記住不要簽股票)，便可當作一次存倉處理，不須浪廢金錢。

[ 本帖最後由 dlalden 於 2008-11-1 12:33 編輯 ]

作者: dlalden 時間: 2008-11-1 12:31:33

投資小貼士2--寄失股票及退票點算

係論譠，在IPO新股上市後，就會有人問寄失股票點算，解決方法如下﹕

1. 首先打去過戶處，假設過戶處為中央證券登記(電話﹕2862-8628)同職員表示未收到股票(當然最好是在上市後第二個工作天還未收到時才打去，因為你的股票已是凶多吉少)。如股票為其他過戶處，可查看http://www.hkex.com.hk/markdata/markstat/rpt_registrars_c.html，方法大同小異。

2. 之後職員就會FAX一份遺失表格俾你，你填完之後FAX返去，職員就會使張股票失效，同埋職員會寄一份表格同宣誓紙俾你。

3. 你填完之後，你要去民政事務署宣誓。

4. 宣誓完你要連同一位夠18歲以上人士(見証人)約時間去灣仔合和中心中央證券登記總部辦理手續。

5. 之後約一個星期後，你便可以去灣仔中央證券登記領回股票。

備注﹕
有人問可否加快手續，其實有步驟是可以加快，就是FAX完遺失表格後，不要等他再寄一份表格同宣誓紙俾你，而自己連同一位夠18歲以上人士與職員約時間直接上去填，並即時到民政事務署宣誓，這可省回郵寄時間。

值得留意的是﹕你是可以不上灣仔中央證券登記領回股票，而叫他直接寄掛號到你屋企，而且是完全免費。

此外，股東名串錯名或身份証號碼印錯，如果非嚴重，過戶處會蓋修改印校正就可以同正常既一樣，但如有大錯就會出過張俾你。

寄失退票補領程序如下﹕

1. 寫一封信包含以下內容
a.姓名(必定寫英文姓名，如用中文信，可以括號形式加英文姓名)
b.身份証號碼
c.地址(必定寫英文地址，如用中文信，可以括號形式加英文地址)
d.聯絡電話
e.股票編號及名稱
f.交待你未收到退票事宜，要求過戶處補發

2. 傳真到相關過戶處，傳真號碼如下﹕
http://www.hkex.com.hk/markdata/markstat/rpt_registrars_c.html

3. 會以掛號形式寄到府上，需時4-6個工作天。

[ 本帖最後由 dlalden 於 2008-11-1 12:33 編輯 ]

作者: dlalden 時間: 2008-11-1 12:32:08

投資小貼士3--如何用英文寫一張正確支票

如各位申請新股，台頭要寫既係抄返Made payable to'.......'裏面果段文字，千祈唔好抄多抄錯或抄少，還有要畫兩條線，線中可寫「Account Payee Only」(唔寫亦無妨)，最重要係唔好作個名出黎。

日期千祈唔好寫錯，如用美資銀行一定要小心，因為「日」同「月」是互換位置的。例如英文1-2-2006即2006年2月1日；但美式英文係2006年1月2日。

仲有千祈唔好在Hundred, Thousand, Million, Billion, Trillion後加上「s」，因為正確寫法係一定沒有的。但如Dollar或Cent是多於一，他們是要加「s」。多口講句，「One Billion」係十億。

又有人問Cent即係中文既幾多，答案係「分」或「仙」(粵語)，但一角係10仙，英文即Ten Cents。

寫英文支票係最好全寫大楷或各單字首字為大楷，但注意「and」的「a」是用小楷，這是英文問題，本人不深入解釋，以下亦有此例子。

所以如申請一手上海集優($4,242.42)既正確寫法係(傳統寫法，其他寫法不談)﹕
Four Thousand Two Hundred Forty-two Dollars and Forty-two Cents Only
如申請一手大連港($5,202.02)既正確寫法係﹕
Five Thousand Two Hundred Two Dollars and Two Cents Only
註﹕「Hundred」與「 Dollars」之間是可以加and，這是英式與美式英語之別，兩者皆可；此外，亦有人會話支票寫銀碼前方已有Hong Kong Dollars字樣，所以不需寫Dollars，這是正確的，但可以肯定答各位如寫亦同樣正確，如各位有用白表申請新股而又收過退票的話，亦經常見退票印銀碼前方有Hong Kong Dollars字樣，但後方亦加Dollars。多口講多句，如要唔寫Dollars，Cents係要寫係數字前面(因為Dollars都係寫係數字前面)，以求統一。

以下是簡單對數表1-21; 30; 40; 50; 60; 70; 80; 90; 100; 1,000; 10,000; 100,000; 1,000,000
One, Two, Three, Four, Five, Six, Seven, Eight, Nine, Ten, Eleven, Twelve, Thirteen, Fourteen, Fifteen, Sixteen, Seventeen, Eighteen, Nineteen, Twenty, Twenty-one, Thirty, Forty, Fifty, Sixty, Seventy, Eighty, Ninety, One Hundred, One Thousand, Ten Thousand, One Hundred Thousand, One Million
大家要留意40的寫法是「Forty」是沒有「u」的。此外，「-」之後要用小楷，如上的21。

最後，想講講自發此帖後，此帖已廣泛地轉貼到好多唔同既地方(有冇引出處我唔知)，而且亦收到不止一個既回應話個Dollars字應該省去，因為支票已有Hong Kong Dollars字樣，咁係對寫支票一知半解既講法，因為正確寫支票既方法又何止一種，如果自己識一種寫法就話第二種寫法有問題，咁係井底之蛙既見解，我可以話俾各位聽，寫支票又點止兩種方法，如要係一個短短既小貼士內全部列出，我諗已經係一篇論文，請先求知，後再回應，好嗎？

此外，Goh1版友亦提供銀碼兌換中英文網址供大家使用，不過當然大家最好明白點寫唔洗成日查。
寫支票時, 數字變英文不求人方法 , 先按這 => http://www.thisiscool.com/Num-Num.htm
打入沒有逗號的號碼 (例: 76767.60) 然後把 Cardinal 轉 Currency 最後可以按 Convert

寫支票時, 數字變中文不求人方法 => http://www.mandarintools.com/numbers.html

[ 本帖最後由 dlalden 於 2008-11-1 12:34 編輯 ]

作者: dlalden 時間: 2008-11-1 12:32:30

投資小貼士4--實物股票如何轉名

首先係邊度有申請表格問題？
其實申請表格就係你手持實物股票既背後，只要你準確無誤地填妥背後表格就可以。或者本人解析一下一些名詞。轉讓人即實物股票持有人；承讓人即實物股票既新主人；見證人即轉讓人及承讓人以外既一名十八歲以上人士。

申請手續如下﹕
1. 填妥上述表格，並將表格帶往灣仔告士打道5號稅務大樓3樓
a.到6號窗「接待及其他文件呈交處」取籌
b.到4-5或7-11號窗「文件評稅處」遞交文件。
c.到12-16號窗「交款處」俾錢(收費為每市值1000元收2元厘印費)，然後耐心等候打厘印。
d.到17-19號窗「領回處」取回文件，即稅務局的工作已完成，然後要到過戶處。

2. 假設過戶處係中央証券登記(一般都係，如屬其他過戶處可看此連結「http://www.hkex.com.hk/markdata/markstat/rpt_registrars_c.html」，手續差不多，只係地點唔同而已)，跟住拿已打厘印的股票往灣仔皇后大道東183號合和中心1712-1716室即可，新股票費用為每手2元5角(大批轉名有折扣及可付費加快程序)。

3. 一般在10個工作天後已轉名既實物股票可到過戶處拿取(但記住唔好超過拿取日首天起計30天，因為要收託管費每手2元/月；此外，千萬唔好早過單上指定日期領取，小弟試過早一日經過灣仔想先拿股票都唔可以，因部電腦SET死咗)。

4. 舉一個例子講，如你的股票市值4000元，手續費為$5(印花稅)+$2x4(厘印費)+2.5(新股票費用)=15.5元(但要視乎數量而定)

備注﹕
1. 轉讓人、承讓人及見証人三者都「不一定需要」出現在稅局或過戶處，只要填妥表格，可找朋友代辦；但取回股票時如是代領記住簽回條授權的一欄。

2. 以上資料，亦可致電中央証券登記﹕28628628後按15，亦有相關資料。

3. 記住日期一定要填遞交當天或前7日內，唔係就會被罰款(其實大家最好唔好寫，等佢蓋日期印算)。

4. 題外話，如要轉地址，可到過戶處填表格交回即可(一定要正本，不可傳真)，如要改股票列印的地址要交費$2.5；如只通知過戶處而唔改股票，費用全免。

[ 本帖最後由 dlalden 於 2008-11-1 12:34 編輯 ]

作者: dlalden 時間: 2008-11-1 12:33:05

投資小貼士5--如何看現貨即時報價系統

所謂股票交易，其實一定存在買方同賣方。就以(3988)中國銀行既其中一口即時報價為例子，作一個解釋。

首先講講買賣差價方面，每一個價格組別的差價都有分別，最近港交所做一系列既操施，就係要縮窄當中每一個界別的差價，當中大價股縮窄差價已經實行。以下解釋輯自go2china版主既投資學堂~~新手必讀。

股價(元)    上升 / 下跌價位(元)
0.01-0.25          0.001
0.25-0.50          0.005
0.50-10.00          0.010 <=(3988)中國銀行屬於此差價級別
10.00-20.00       0.020
20.00-100.00    0.050
100.00-200.00    0.100
over 200.00       0.200

以下紅色的數字是排隊股數，M即百萬(MILLION)，俗稱球；适號是買入人數。
由於報價系統所限，每次報價都通常只得買方及賣方各4口價，而表達既方式亦以簡寫+1, +2, +3......表達，即高1格，高2格，高3格......；-1, -2, -3......表達，即低1格，低2格，低3格......

買入
3.39 <=排隊買入價或即時沽出價
64.08M  (1,492)<= 排隊買入價或即時沽出價有1492人買入64.08球
60.25M  (947) <=排隊買入價低一格即3.38有947人買入60.25球，如此類推
27.22M (277) <=排隊買入價低兩格即3.37
46.58M  (1,319) <=排隊買入價低三格即3.36
賣出
3.400 <=排隊賣出價或即時買入價
145.10M  (625) <=排隊賣出價或即時買入價有625人賣出145.1球
100.10M  (333) <=排隊賣出價高一格即3.41有333人買入100.1球，如此類推
60.88M  (285) <=排隊賣出價高兩格，即3.42
29.35M (161) <=排隊賣出價高三格，即3.43

在交易記錄亦間中出現一些英文字母，其解釋輯自go2china版主既投資學堂~~新手必讀。

「X」=  代表不透過自動對盤或特別買賣單位的成交，而買賣雙方為同一經紀行
「Y」=  是指透過自動對盤成交，而買賣雙方為同一經紀行
「D」=  碎股成交
「P」=  開市前成交 (指交易在開市前已達成，其中包括在上個交易日收市前達成而未及輸入系統的成交)
「M」=  代表不透過自動對盤或特別買賣單位的成交
「U」=  競價成交
「*」 =  成交已遭反駁/取消

交易紀錄
10:21 9000 3.400 <=10時21分有人在3.4交易了9000股
10:21 10.0K(Y) 3.400 <=10時21分有人在3.4交易了10,000股，K即千
10:21 2000(Y) 3.390 <=10時21分有人在3.39交易了2000股
10:22 50.0K(Y) 3.400 <=10時22分有人在3.4交易了50,000股

以下的號碼是經紀牌的號碼，由上而下，由左至右排列，詳情可以到http://www.hkex.com.hk/expartlst/sehk/inbroker_c.htm查看
買盤
7185 7188 8185 5925
7188 7189 8595 0278
7217 7215 9426 2978
7187 7216 5907 8135
7190 7217 8147 2804
7185 7185 6969 2365
7216 7190 8594 5539
7186 7215 8136 9425
7187 7216 8174 7910
7217 7217 5667 1349
賣盤
8136 8969 2338 5788
8136 8969 7379 5787
8134 0337 1195 5789
8186 0335 6498 6387
8186 8155 6498 6385
8186 4838 1195 6386
4687 6529 7709 6425
9415 0996 6498 0315
6223 7139 6498 9435
7176 7418 6498 6825

作者: dlalden 時間: 2008-11-1 12:36:59

投資小貼士6--點定開市價

開市時為甚麼在10:00已有一個確定既價錢，這是因為有一個叫市前交易時段，這時段又稱市前指導盤時段，是在早上交易時段前增設的三十分鐘交易時段。係LEE個時段，買方同賣方可以各自出自己當天心目中的價錢，但出價既盤同平時各位落既盤係有分別既，市前交易係要以競價形式落盤，通常分以下兩種競價盤﹕

第一種是競價盤
競價盤沒有指定價格，在開市前時段輸入交易系統後，將按最終參考平衡價格進行對盤。參考平衡價格是指若當時進行對盤可以成交最多股數的價格。輸入競價盤的投資者需注意，在輸入買賣盤時是未知道最終的成交價的，該價格可能不在其預計的範圍內。所有未能配對的競價盤將會被取消。

「市前交易時段」輸入的競價盤，將傳送到香港聯合交易所，其安排如下﹕

上午9時30分至9時45分(輸入買賣盤時段)
可輸入、減少及取消

上午9時45分後至9時50分(對盤前時段)
只可輸入但不可減少或取消

上午9時50後分至9時58分(對盤時段)
未能配對的競價盤將被自動取消。

第二種是競價限價盤
競價限價盤則需指定價格。如指定價格等於或優於最終參考平衡價格，這類買賣盤便可獲配對。所有未能配對的競價限價盤將自動轉為限價盤，並於當日早上交易時段執行。

「市前交易時段」輸入的競價限價盤，將傳送到香港聯合交易所，其安排如下﹕

上午9時30分至9時45分(輸入買賣盤時段)
可輸入、減少及取消

上午9時45分後至9時50分(對盤前時段)
不可輸入、減少或取消

上午9時50後分至9時58分(對盤時段)
未能配對的競價限價盤將被自動轉為限價盤，並轉至當日早上時段繼續執行。

就是經過以上步驟，10:00就可以有一個確實的開市價。參與市前交易的好處是可以親身參與定一個市價，雖然你可能會話參與的影響不大，但我可以答你並唔係，尤其係一D成交唔多既股份，本人經常係9:30前落盤，間唔中都會排到第一名，而隨後既包括大戶，有時都會跟本人排隊。如成交大既股份，如中國銀行6月1日上市首天，本人就在$3.2排競價限價盤，由於開市價為$3.15，所以本人亦可以係較優既$3.15這夢幻價入到心頭好。

多口講句，仲有一個叫暗盤，究竟又係乜黎，其實係有一D股票行係場外開盤，係某新股上市前，給一D心急既投資者一個買賣既機會，所有交易將會以P盤*形式在上市當天上板，如各位有興趣，可在某新股上市前一天到http://www.cyberquote.com.hk參考暗盤價，亦可以在某証券行開戶口親身參與。

*P盤即開市前成交 (指交易在開市前已達成，其中包括在上個交易日收市前達成而未及輸入系統的成交) ，其解釋輯自版主既投資學堂~~新手必讀。

作者: dlalden 時間: 2008-11-1 12:37:22

投資小貼士7--大戶動向

其實間唔中都會見到版友問見到大利是機大戶點樣，大戶點樣，究竟佢地係度做緊乜？今日小弟就同大家探討下佢地係度搞乜。

同一大戶排兩邊
大戶好鍾意排晒買賣雙方，由於佢地買賣數量龐大，所以只賺一格差價已經有可觀收入，兼且係T+2，可以話係無本生利，佢地係樂意賺既，尤其係收窄差價前，利潤更豐；另外，大戶亦可令散戶覺得排唔到，迫你現價貨或出貨。

新股上版首日市前指導盤出現天價買盤
大戶(尤其係新股的保薦人)會係市前指導盤時段有時會出天價幫自己睇既新股造勢，令人覺得上升既憧憬升溫，但此情況亦開始收斂，原因自中國財險上市首天，招股價$1.8，但市前指導盤居然可以出現$100天價買盤，當然最後第一口價承$2.4，但此事件被證監會調查後，日後的新股市前指導盤天價買盤問題得以收斂，但亦有被mark高情況。

突然出現大量買/賣盤
在大利是機有時見到經紀排位突然出現大量買盤或賣盤，其實此亦為托價或壓價行動，建行等成交活躍股份亦曾在幾秒鐘內出現增加200球壓價盤，等散戶爭相走避。其實此盤並不一定係真正買盤或賣盤，因為一日未成交，一日都可以取消，大戶可能只係玩心理，一排到佢地，佢地就縮，根本唔係真金白銀買賣。

成交紀錄連續出現不齊頭大額數目
係成交紀錄間唔中連續出現不齊頭大額數目，LEE D係大戶間互傳訊息既一種方法，由於怕出現被外來人無端傳出同一交易暗號，所以大戶互傳訊息通常係連續地出現不齊頭大額數目兩次或以上以求確認，不過暗號可以成日變，佢地究竟搞乜無人知，但見到既話大家不妨提高警覺。

大行不斷出股票報告
大行經常會出一D改動某股票評級或買/賣建議既報告，其實大家真係唔好咁認真睇，因為佢地出報告根本可以話係無責任要負，佢地完全係為影響市場氣氛。我諗我既口頭禪﹕「講之麻，又唔洗錢既。」係對LEE D報告既最佳評價。

操控衍生工具以圖利
香港窩輪成交係全世界之最，好多香港投資者引以為傲，但係成功背後其實係帶住好多散戶既辛酸。窩輪唔跟正股走經常屢見不鮮，更甚既就係大戶會係某窩輪到期日前將佢變到價外輪，從而散戶無得行使認股權，令輪戶蒙受損失，亦令買正股既散戶承受股價既波動。最近牛熊証投入市場，標榜牛熊証價格跟足正股走，但亦多一項踢穿價既條款，一經踢穿即變廢紙，亦好值得各位思考。

維持某股股價長時間不動
大戶有時用盡九牛二虎之力威迫利誘都唔能夠震走散戶，其實最高境界係維持住某股股價不動一段相當長既時間，用悶字闕悶走散戶，當散戶走得七七八八既時候就開車，令散戶後悔，當中亦有好多經典例子，如以前中石油，中銀香港，中人壽，領匯，而家既建行亦有當中影子。其實香港討論區係一個哨兵站，多人講既股票即多人有貨，即散戶未走，如之前好多人講但變到好少人講既股票，即部份散戶已落車。

在尾市用連環細成交推高或壓低股價一格
大戶通常在收市前用連環細成交推高或壓低某股股價一格，由於最後幾口成交價對決定收市價黎講好有參考價值，所以大戶樂意用少少力將某股股價托高或壓低一格。

用人為力量影響收市指數或升跌點數
大戶善於玩心理戰，只要能增加佢地策略成功機會既，佢地都會做。最近大市曾大跌777點，期指同日亦巧妙地下跌911點，兩個點數都有不詳既感覺，從而營造絕望既氣氛。

此小貼士乃本人之個人意見，同意與否視乎個人選擇。

作者: dlalden 時間: 2008-11-1 12:37:52

投資小貼士8--碎股買賣

碎股(Odd Lot)即係唔夠一手既股票。碎股產生既原因有好多，例如﹕以股代息；公司派送紅股；供股；幾合一股；月供股票等。

碎股特色﹕
1. 一般黎講碎股係唔可以買入(買都係以月供股票等形式買入；但自由市場，俾得起錢無野無可能既，所以我話一般)，只能賣出。
2. 如要賣出，通常需要低於市價*，因為市場成交係以每手(Lot)計，如你唔夠一手，人地要晒工夫砌夠一手，所以低於市價只係用黎補貼佢地既行政費用，並唔係食你價，當然佢地有得賺先會幫你做。
3. 係大利是機成交時會出現「D」字符號以作識別。
4. 買賣成交好少，因為行政費用高，所以有時賣咗都補唔番手續費，如數量小既話甚至要倒貼。
5. 如果有碎股而又多於一手，可以一併沽出，唔洗俾兩次手續費。
6. 碎股係有機會無人承接既，由於香港市場夠大，所以通常都有人接貨，無人接既多數都係成交少既股票。此外，自由市場好講供求，如好想即時出貨都有方法，就係大幅減價求售。
7. 如要賣碎股，可以去有碎股買賣服務既銀行或股票行掛「特別買賣單位盤」 #交易。

散戶係碎股賣出時較嚴峻既形勢下，仍然有人從唔同方法收集碎股原因如下﹕
1. 所需費用唔多，如買一手滙豐，香港打工仔根本好少有能力一個月買到一手，幾個月買一手又可能未儲夠就已經洗晒D錢，所以都係以月供形式(手續費通常一年收兩次)先可以持之以恒。
2. 持股人士持有大量股票，就算以股代息，都可以好容易儲夠一手。
3. 睇好某股前景，所以用平均買入法來收集，到最後亦有可觀利潤。

香港曾有人建議成立碎股市場，但由於市場仲未有共識，所以暫時未能成事，但由於有碎股既散戶人數亦唔少，所以成立碎股市場都唔係無可能既。

註解﹕
*小弟亦曾試過市價放碎股，當年E-trade新客戶每人送200股南華早報(583)股份(當年每股值成$5)，南華早報應該2000股一手，但小弟亦有幸可以市價放，雖然例子特別，但可以解釋市價放碎股唔係無可能(睇下閣下銀行或紀經行掠你幾多行政費)。

#如想知詳情可流灠http://www.hkex.com.hk/infra/ams3/Chinese/Trd-c36a.doc

作者: dlalden 時間: 2008-11-1 12:38:19

投資小貼士9--股價細談

小弟最近聽到一個好有趣既分析，令我有點啼笑皆非，其實LEE個分析係討論區都間中見到，但今次事主係我一個朋友[朋友甲(事先聲明，只係佢一個，我其他朋友無問題)]，所以感受更深刻，亦令我有寫投資小貼士9既衝動。

朋友甲對招商銀行非常有興趣，所以一早已叫小弟留表格俾佢方便申請，招行截止日，小弟再遇上朋友甲，談話撮錄如下﹕

小弟問﹕「交咗招行申請表未？」
朋友甲答﹕「未，我唔會申請，原因係招行太貴，要成$8.55，貴中行同建行好多。」

小弟聽完當堂嚇咗一跳，此事反映出好多投資新手錯誤觀念，所以值得同大家探討一下。

價格高唔等於貴
A公司值$100，發行量100股，每股值$1；
B 公司值$50，發行量10股，每股值$5。
B公司係唔係貴A公司4倍？聰明既各位當然答唔係。

如何定股價及發行量係市場策略
點解價格會定得有高低之別，因為每間上市公司既市場定位都唔同，有D公司係諗住鼓勵成交，所以將定價格定得低一D或者將每手股數減少，從而每手入場費較低可以吸引散戶購入。
但有一D公司會將股價定得好高，因為佢地唔係諗住俾太多散戶玩，只係諗住俾基金持有，以增加其穩定性，就好似全港最高入場費既53國浩集團，一手成10萬銀，但PE可以少過10倍，股價未必算貴，只係入場費高。

股份可以拆細及合成
公司既市場策略可以隨著市場策略改變而改變，如公司既盈利上升而令股價不斷上升，該股入場費必定大增，所以將股價拆細可以增加散戶既參與度，如匯豐；宏利；港交所等散戶愛股亦曾拆細。大家留意，拆細後只係發行量多咗及股價細咗，但對市值或盈利能力係無乜大改變。
相反，有一D公司會因為賺錢能力及形象問題，令股價一沈不起而要將股份幾合一以防每手入場費太低或方便有再跌空間，如某公司一年可以抽水6次，令股價不斷下跌，所以必須合成股份，再進行配股從而再掠散戶。合成股當然發行量會減少，但股價卻升咗。

股價係自由市場當然由市場決定，市場上較客觀既參考既指標通常用以下兩種﹕

市盈率(越低越快返本)
市盈率(Price-to-earnings Ratio，簡稱P/E Ratio)，如果講得再簡單D，即如要將一筆資金投資一隻股票，靠利息要幾多年先可以攞番D本金。市盈率越高，番本年期越長。

現價市盈率高唔等於貴，因為散戶接受現價市盈率高低會隨行業而有所不同，同行業先可以比較市盈率，中資保險股市盈率有時去到30倍樓上，但股價可以越升越有，原因係市場發展潛力大。係中國，而家只有約1%人有買保險，市場發展空間大，所以市盈率可以因為公司收入增加而降低；相反，香港既零售股由於市場發展成熟，鋪租不斷上升，所以毛利不斷下降，就算市盈率去到個位數字，股價仍然有向下趨勢。

市賬率或資產淨值(越低買得越著數)
市賬率或資產淨值(Price-to-book Value Ratio or Net Asset Value，簡稱P/B Ratio或NAV)，兩者公式一樣，前者多用於銀行股；後者多用於地產股，即每股資產，市場願意用多於或少於佢既賬面值購買既比率，多於1即願意俾多過賬面值黎買，少於1即願意以少過賬面值買入。

由於近期中國打壓房地產股，所以有好多國內樓房地產股以低於資產淨值值3成以上招股，但反應亦屬一般，所以資產平賣俾大家都少人買；相反中資銀行股以市賬率多於兩倍仍不乏追隨者，因為大家都睇好國內金融業既前景。

此小貼士乃本人之個人意見，同意與否視乎個人選擇。

作者: dlalden 時間: 2008-11-1 12:38:41

投資小貼士10--走勢陷阱

最近幾隻新股，走勢都係先升後跌再回升，形態就好似一個英文字母「N」，於是就有分析員見到咁既情況就出來寫文章就話係「N」型走勢，話抽唔到新股唔緊要，其實善用「N」型走勢回報可能更多(俾你夠唔夠膽咁做？)，所以小弟又想發表下對LEE D睇法既意見。

其實用英文字母同符號黎形容走勢已經係由來已久，但其實咁樣分析係唔係真係有意思？大家要知道分析員係靠寫野搵飯食，所以佢地見到少少野就唔會放過，寫咗先方便交稿。其實大戶點樣玩股票係多元化既，你覺得係咁佢就黎個相反既玩法，殺過你一個措手不及。今日係「N」型，唔代表第二日唔係第二種型；再者「N」型會唔會加少少野變「M」型都係言之尚早。

小弟覺得「股票買賣」大部份時間係一種「零和遊戲(Zero Sum Game)」，即唔係你死就係我亡，散戶想賺大戶錢，大戶更想賺散戶錢。36計第30計「反客為主」係大戶最常用既招式，大戶善於代入散戶既角色，散戶眼見中國銀行上市初期即逐步攀升，諗住招商銀行上市首日用同一玩法，點知招行上市時大戶即黎第二個玩法，一開即推到高位，然後慢慢回順。

股票市場大致分為三派﹕基本因素分析學派，圖表分析學派同埋市場感覺學派。前兩者係較科學既派系，但當中圖表分析學派較容易跌入走勢陷阱。太過著眼於圖表走勢或追得太過貼市可能輸錢越容易，因為有時有假突破或假跌穿既出現。250天線被視為牛熊分界線，如升穿或跌穿都會視作轉勢，但事實未必一定係咁樣。

舉一個例子，2004年5月初亦曾跌穿250天線，但一個月後亦升回250天線以上，如只用圖表分析可能已經沽貨離場。

最後，想同大家講句老生常談既話，就係「圖係大戶劃出黎既」。

此乃小弟個人意見，目的並唔係否定圖既作用，而係提醒投資者小心跌入走勢陷阱，同意與否，視乎個人選擇。

作者: dlalden 時間: 2008-11-1 12:39:08

投資小貼士11--如何看期貨即時報價系統

首先講下乜野係期指先啦，顧名思義，期指就係將來既指數，即預期既野，所以會有個「期」字，係投資市場，同將來有關既野都會加個「期」字係頭。

期指同埋恒指既分別就係在於預期現在同將來既唔同，但亦唔會相差得太遠。由於兩者係有分別，所以就出現兩個名詞﹕高水同低水既出現。

高水即期指高於恒指；低水即期指低於恒指。

係期貨市場，係有好多種產品(下列報價機列出8種主要期貨)，其中最受歡迎當然係恒生指數期貨，但由於政府規定要俾按金，而且按金對於一般散戶黎講屬於偏高水平，所以成立咗小型恒生指數期貨。由於兩者都係恒生指數期貨，所以易生混淆，於是行內人就將佢改咗個簡稱，恒生指數期貨就叫大期(恒指每升/跌一點就令參與者獲利/損失$50)；小型恒生指數期貨就叫細期(恒指每升/跌一點就令參與者獲利/損失$10)。但要留意唔好叫大型恒生指數期貨，俾人笑唔好話我同你分享。

此外，亦有兩個名詞係結單經常出現，一定要知係乜黎，首先係長倉(LONG)即買入；其次個係短倉(SHORT)即賣出。LEE個遊戲各位要做既野就係要令到長倉及短倉既數目係一致(即平倉)。

期指結算日是在每月尾二的交易日，如到期指結算日還未平倉的合約，就會自動以結算價平倉，所以係結算日或結算日前，就會出現轉倉(由即月轉下月)活動，以防自動平倉，所以市況會極為波動。

入正題啦！究竟期指即時報價系統點睇？

以上串流式期貨報價機，只要申請期貨戶口就可以免費使用。

一般黎講，每種期指報價系統都會出現兩種月份既報價，一種係即月(由於小弟執筆時間為2006年12月，所以係報價機上顯示即月月份為12/06)；另一種係下月(在報價機上顯示下月月份為01/07)。

係畫面中出現兩種英文字母，B即Bid出價(買)；A即Ask要價(賣)。
係即時報價機上可以見到一條粗黑線係正中，以分開最接近市場成交價既買同賣盤，就以大期12/06為例，在19254點有人排隊係現價出價買2張，B2即現價低1格，B3即現價低2格如此類推；相反，在19255點有人排隊係現價要價賣4張，A2即現價高1格，A3即現價高2格如此類推。但要注要差一格唔代表一定係1點之差，因為有D點數可能無人排而會1格差幾點甚至幾十點(大家睇下新華12/06，買賣差價相差46點，期權金每點$50，相差期權金即46點x$50=$2300)，所以參與者通常會玩即月期指，因參與人數多，所以每格差價會較接近。

按金要求﹕
由於按金會不停轉變，所以小弟只能提供2006年10月3日政府按金要求作參考﹕
恒生指數期貨    ﹕$54,935/張
小型恒生指數期貨﹕$10,987/張
國企指數期貨    ﹕$23,006/張
新華富時中國    ﹕$37,634/張

期貨與現貨市場有四大分別﹕
1. 政府規定要有指定按金先可以參與。
2. 可以先沽出，然後買入做平倉(即完成買賣手續)，平倉後一日後可取回按金，較股票T+2快一日。
3. 期貨市場有兩個市前指導盤時段(早上及中午)，較現貨市場多一次。如各位想了解市前指導盤時段既大概運作可參閱投資小貼士6。
4. 開市時間早現貨市場15分鐘；收市時間遲現貨市場15分鐘。

P.S.如要參考美國期貨市場走勢，可到以下網址﹕
http://www.eltee.de/quotesfuturesym.php

最後提醒大家，期貨市場係高風險投資，所以大家切記要小心評估自己承擔風險既能力係唔係適合參與。

作者: dlalden 時間: 2008-11-1 12:39:35

投資小貼士12--如何看公司業績

每間上市公司都會按時發放業績報告，但大家又究竟知唔知你地所持有股票既公司發放D乜野俾你，係唔係只係賺得越多錢越好？係賺錢之餘，究竟有乜野要注意既地方，小弟想同各版友分享一下﹕

公司既估值通常會被會計制度低估，由於﹕
會計制度以保守及不高估(Prudence)為重要原則。最受影響當然係地產股，因為地皮估值變化好大(但要留意亦不是故意低估)。
研究唔係公司既資產，只係公司既開支。最受影響當然係科技同埋藥業股，因為科技同埋藥業公司投放好多資源係科研，投放資源多可增加將來盈利，但要留意科研轉為盈利既效率。

盈利今昔比較
業績公告一定會連埋上年甚至再上一年既業績一齊顯示，用意係方便比較，邊個項目有不沉常既改變都可以一目了然，大家不妨鑽研一下。

持有其他股份公司對盈利供獻
子公司貢獻﹕由於母公司可能分拆子公司上市，子公司盈利供獻都可以起到作用，係業績入面亦可以睇到，故要留意埋子公司既質素；
持股份公司貢獻﹕有時同系或業務性質相同既公司都會互持股份，以收互相穩定股價之用，所以要睇埋該公司持有既公司質素之優劣。

要睇公司賺錢係要睇三個主要現金流既活動，D錢邊度黎都要睇清楚。
營運活動﹕公司本業既營運，最能反映公司既質素，因為始終係要靠本業賺番黎既錢先係最長遠既，否則就會俾人不務正業既感覺。此活動包括所有既盈利同支出。
投資活動﹕買賣資產會有利潤及虧損，雖然眼光獨到可以令公司盈利上升，但可唔可以次次都投資賺錢，如年年投資賺錢，今年只要平手都已經令公司盈利能力受影響，所以未必係長遠，有時投資活動只不過係用黎掩飾營運活動既不足，大家可以諗下當年「賣橙事件」而令某公司業績靚幾多。
融資活動﹕公司可能會融資黎處理即將到期既債務，大家要有一個重要既概念就係一間好賺錢既公司係可以因為冇足夠手頭現金而倒閉，所以現金流多寡對公司成敗係非常重要；此外，如果公司現金太多，可能會用黎還債以減輕利息支出或派發股息回饋股東。

點解著重睇公司現金流情況？
因為投資者、信貸人及所有對該公司有興趣既人，都希望了解該公司流動性最高既資產--錢。一D非流動性資產如廠房及機器等衡量佢地既價值都係以錢為單位，但要多一重變賣同埋找尋買家既手續先可以變回錢。如該公司可能因市場傳言而令債權人追債，公司既解決短期債務既能力就取決於此。有時有D公司會放棄利息收入或增加利息支出黎保持公司有足夠現金以應付不時之需。

派息係唔係越多越好？
派息多當然可以增加股東即時回報，但公司需要預留現金投資，派息多可能影響將來發展。因此，派息政策影響公司深遠，派得多對現時股價當然有支持，但將來股價能否獲支持則取決於公司能否用派息後剩餘既資金所製造既未來盈利。

轉換會計師樓
有時，公司會係業績公布前後轉會計師樓。轉會計師樓基本上係壞消息，因為如要跟一盤數，會計師跟開就會較熟悉，所以都係熟手做既會比較好，如轉換會計師可能有D鮮為人知既事，令到股份添上不明朗因素，只有一個情況轉會計師樓係好消息就係公司要擴大，會計由普通會計師樓轉至較大型會計師樓以提升會計質素。

作者: dlalden 時間: 2008-11-1 12:40:07

投資小貼士13--好友與淡友

係投資市場有兩個術語，分別係好友及淡友，好友即睇好既投資者；淡友即睇淡既投資者，究竟好友與淡友係唔係真係勢不兩立？單方面可唔可以獨立生存？小弟想同大家探討下。

首先，小弟有一個問題想問大家﹕

各位有冇諗過如果所有人想法一致，投資市場會係點？(答案在後面)

唇齒相依
投資市場點解可以運作，其實係因為同時有好友及淡友既存在，因為冇咗好友買貨，淡友又點可以出貨？相反，冇咗淡友出貨，好友又點可以有貨買？所以，大家係依賴對方既存在先可以生存，正所謂「唇亡齒寒」。

身份轉換
其實好友與淡友既身份係會係會一世唔變？天生又會係會係一方就一世都係做死一方？小弟唔排除有LEE個可能，但大部份投資者都會隨住市況而轉換身份，今日係好友，明日亦可以變做淡友。

答案﹕
如果所有人想法一致，世界上投資市場會完全停頓*，投資市場根本唔會出現，因為如果全世界都係好友，全部人都會買貨，冇人出貨；反言亦之。

*合理假設為好友及淡友想法與行動一致，其他因素如好友睇好但無錢洗要沽貨套現等等則作別論。

係財經版，小弟經常見到版友因為大家對大市或某股持有唔同意見而出現爭執，但大家又明唔明白「唇亡齒寒」既道理？

作者: dlalden 時間: 2008-11-1 12:43:19

投資小貼士14--認購新股

IPO全寫為Initial Public Offerings，中文即首次公開招股既意思，由於散戶參與程度越來越高，因此都想同各位分享下小弟多年既IPO經驗。

IPO既申請可以分為四種表格
1. 白表﹕
散戶去銀行取表，然後直接交回銀行，手續費全免，散戶係上市當日派信時間可直接收到實物股票(離島可能遲一日)。

經常有版友問邊度有表攞？
其實一般股份都只係會係招股首日先會知，大型招股活動時，負責人可能想避免混亂同埋方便散戶，先會較早公布。

一定要留意支票薄一定要有自己名，如無自己名既支票一定要去銀行蓋章確認先可以申請。

2. 黃表﹕
實際上再細分兩種，一種係股票行直接以你股票戶口名義申請，身份証號碼「唔會」係報紙上公布，散戶只需打一個電話就可以，非常方便，但要收手續費；

另一種係客戶直接上股票行填表，以個人名義申請，客戶需要自己出支票，身份証號碼「唔會」係報紙上公布，由於同白表情況差唔多，只係上市當日股票已直接存入戶口內，但股票行有條件唔收認購手續費。

問題﹕由於身份証號碼無係報紙公布，可能造成一些股票公平分配上既漏洞，例如546阜豐申請2萬股有2172份申請，全部至少獲1手，當中有869份可獲2手，由於無向外公布，你係唔係果869位幸運兒，只能靠股票行公布，所以大家一定要使用信譽良好既股票行。

3. 藍表﹕母公司分折子公司上市，母公司股東可優先認購股份既表格。
4. 粉紅表﹕準上市公司員工認購股份既表格。

歡迎光臨 AGAMES 討論區 (http://forum.agames.hk/)