AGAMES 討論區

標題: [蘋果] 調錯嬰受害者　炮轟醫管局 [打印本頁]

作者: lamxdxd 時間: 2009-8-20 15:00:50 標題: [蘋果] 調錯嬰受害者　炮轟醫管局

【記者袁慧妍報道】「如果係周局長（周一嶽）個小朋友調轉咗，佢會點？」公立醫院調錯嬰並非新鮮事，傳媒 07年底早已踢爆贊育醫院 1976年調亂李國賢及另一男嬰身份，但受害者賢仔至今仍未尋回親生父母。賢仔昨日開腔炮轟醫院管理局一錯再錯，質疑當局沒有認真檢討機制以致重蹈覆轍，周一嶽監管不力更是責無旁貸，「再聽到發生呢啲事，真係好荒誕！」
32歲的賢仔前晚剛從台北返港，得悉伊利沙伯醫院日前被揭發調錯嬰，十分愕然，「呢啲低級錯誤點解又再發生？」他認為當年事件被揭發時，他本人的個案只是冰山一角，早已去信醫管局及特首，希望當局認真處理事件並檢討機制，惟對方的回覆相當冷淡，又稱現行制度相當完善，不會再出錯。賢仔激動地指年半以來醫管局甚麼都沒有改善︰「根本唔識檢討話!」

應從市民角度出發
賢仔的尋親過程中，最困難是與官員交涉，「啲官個口咁大，做錯嘢就淨係識搵個總監道歉。」當年醫管局曾公開呼籲，與賢仔出生時間相若（即 76年 11月 28日至 12月 14日）在贊育出世的男子接受基因測試，但賢仔認為醫管局未有盡力協助。他表示，醫管局只寄出 180封信給當時的產婦，但大部份已搬離，醫管局又不肯向稅務局求助領取他們的新地址，「話唔可以跨部門處理，成件事政府只係使咗三百幾蚊郵費。」
賢仔指摘食物及衞生局局長周一嶽「人工唔平，但冇做好份工」，今次再發生調錯嬰事件，反映當局監管不力，容許不稱職員工僅進行內部工作崗位調動，「如果係私人機構，一錯再錯，仲唔炒咩！」他又炮轟特首曾蔭權作為「老闆」，對下屬犯錯竟如此容忍，「佢覺得冇問題，但過唔到市民嗰關。」他怒斥今次事件「離譜」，慨嘆香港出生的兒童已無保障。
他寄語政府有關官員，做每件事應要從市民角度出發，易地而處，才會小心處理事情，「如果係周一嶽、曾蔭權、胡定旭個小朋友調轉咗，佢哋會點？」

特稿：家逢巨變　親情更深厚
32年前李國賢呱呱墮地， 31年後卻發現自己可能不姓李。儘管調錯嬰事件為李家帶來衝擊，但同時令他們一家五口更珍惜彼此感情，同心面對家庭巨變，今年 6月合著新書《一家五口》，憶述 32年來的家庭樂。

「考驗我哋嘅凝聚力」

阿賢及李家合著新書《一家五口》，
書上列明自己的聯絡方法，讓養父母
有機會尋回親生兒子。

與親生父母失散，賢仔仍覺自己「十萬個幸福」。他指中學時已有親戚及同學指他與父母長得不相似，當時他沒有在意；事件揭發後，一班好友不但沒有安慰他，還笑稱：「一早都話唔係親生 o架啦！」
賢仔稱，當年家人透過傳媒訪問盡訴心中情，令彼此更了解內心世界，「係上天畀一個機會我哋，考驗我哋嘅凝聚力。」賢仔最印象深刻是他那位沉默寡言的胞弟，對方知道真相後致電賢仔，希望賢仔親口說不會離開李家，「佢臨收線時仲問，可唔可以嗌我做阿哥。」賢仔聽罷當場流下男兒淚；他沒想到原來胞弟那麼珍惜他這個「阿哥」。
賢仔與養父母及弟妹於今年 6月合著新書《一家五口》，記敍一家人生活點滴。但當問及賢仔會否想尋回親生父母時，他只表示一切隨遇而安，即使重遇，也「叫唔出爸爸媽媽」，「大時大節會約佢哋飲茶……但始終都係家呢個（養父母）親啲。」賢仔已婚，育有一名 5歲大女兒。本報記者

歡迎光臨 AGAMES 討論區 (http://forum.agames.hk/)