AGAMES 討論區

標題: 《童話輕小說》一言難盡，深慨嘆 [打印本頁]

作者: ballball2013 時間: 2013-4-7 14:06:39 標題: 《童話輕小說》一言難盡，深慨嘆

本帖最後由 ballball2013 於 2013-4-8 23:59 編輯

伺服器:免費版
角色名稱:神獸勿近
作品內容:童話的緣份

呢個故事，應該由果個玩緊童話既暑假講起......
[attach]6065[/attach]
　
　
　RU女孩悄悄話你:你聽日得唔得閒呀?我約左表姐兩點鐘係元朗度食野呀，不如一齊食丫！我想見下你呀^0^當時我認識左呢個RU女孩剛剛好一個星期，我亦估唔到劇情就火速發展到相約網聚a_a。果年十四歲既我好好奇想識女仔，但係又驚呢個係網絡騙案。不過我竟然莫名既狗沖，二話不說應承左佢。
　[attach]6065[/attach]
　

　但係，過左兩個鐘之後，我終於明白狗沖既意思，即係狗沖只係剎那唔用腦一味衝衝衝，而唔係確確實實清楚知道自己做緊咩。呢個時候，童話雙經完了，我同RU女孩已經互相交換左電話，之後佢下左線。所以我只好假作籍口，係ＳＭＳ推左佢，我不停反覆思慮呢個ＳＭＳ應該點樣打先唔會太核凸，又唔會破壞我地日後美好既關係a_a，但係我竟然選擇左最老土最娘丙而係最有權威力既籍口：Ｓｏｒｒｙ呀！我媽咪唔準我聽日出街玩呀T_T不如約過下次丫短訊簡單而有力，直接又到ｐｏｉｎｔ，既可以瀨媽媽，又可以樹立乖乖仔形象，五個字總結：完美的籍口！
　
　 [attach]6065[/attach]
　雖然佢繼續游說我，又不停說服我去說服我媽媽，但好快佢已經打消左一切類似既念頭。暑假展轉已經過去，很快便到了中秋節假期。沒有記錯的話，當年應該係舉行打玉兔活動，打敗玉兔，然後得月餅，吃下月餅得字條，集齊字條有禮物。我同RU女孩當然係二人暢遊水晶山追擊月兔啦a_a，我地二人合力總算勉勉強強集齊左一套。RU女孩悄悄話你:yeah!^3^終於搞掂!。其實我唔明白女孩子既心態係乜，心諗我地只係打左一套咋喎，就好似打爆左機咁啦=_=？人地都唔知打左幾多百套啦。不過話雖如此，我當然要配合住她，悄悄話：係^^快D去換禮物睇下先!_!
　　[attach]6065[/attach]
　
　

　其實重點並非月兔活動，而係打完月兔，佢再次提出網聚，今次係家族網聚。RU女孩悄悄話你:不如搞個BBQ囉，我同我表姐都會出席，想叫埋你地一齊玩，好唔好呀？今次，我沒有再狗沖，而係選擇左，嗯，好丫，睇下有冇人去先，佢地去我去，將所有野都慢慢黎，淡淡定再考慮。結果人算不如天算，好多族人都話唔參與，所以最終都無舉行家族BBQ。
  　[attach]6065[/attach]
　時間好快過去，而自從果次之後，佢都無再咁明顯同主動約我去街。
　
  　[attach]6065[/attach]
　直到幾年前，我同她既第一次見面，而且亦係最後一次。幾年前，其實佢已經完全無係童話上線，不過我地不時都會有聯絡，除左朋友般既關心，談話間有時都幾曖昧。
　　　[attach]6065[/attach]
　又到左暑假，會議展覽中心又舉行一年一度的美食博覽展，身邊沒有一位朋友能抽空出席。唯獨佢，傳黎一個短訊，內容大至寫著：「記唔記得我呀!?RU呀^^我約左以前一個網友去美食博覽呀，佢應承左我架啦！所以你都要出席架，次次都約你唔到。你知唔知次次請我食檸檬，我個心好酸呀......今次比我見下你一次咁多啦;)」對我黎講，呢篇短唔單止黎得合時，仲深深打動左我，竟然有女仔會記得我......仲主動約我咁多次！而我就好似一個賤人咁，一次又一次，三返四次咁推辭人地。所以我決定無論如何，今次一定要出席！
　
  　[attach]6065[/attach]
應邀當日，原定三人在地鐵站集合，但由於臨時RU女孩表示自己會遲到，所以就變成我和一位男網友集合，然後到會展再會合RU女孩。我地先到達會展，之後就打比RU女孩，原來佢都同時間到左會場。呢個女仔其實我地兩個男仔都未見過真人，只係見過一張解析度其低既照片，所以真人係點既樣，都係未知之數。
  　[attach]6065[/attach]
「喂？你係邊呀，我地係Ａ入口等你丫。」之後我地互相拎住電話確認對方位置，結果我終於見到佢......佢唔係太高，大概一米五六左右，岩岩好到我心口，頭髮長長，眼大大，著住白色Ｔ－ＳＨＩＲＴ，深藍色熱短褲，
再加對高筒converse，身材仲成個雞扒妹咁款。我心諗今次有福了A0A，點知，晴天霹靂，霹靂晴天，佢身後竟然拖住個男仔，男仔個樣不予置評，只可以話又一鮮花插在牛糞上T_T，雖然我個心已經灰過灰太狼，但係個樣依然好有風度咁問：「咿～你男朋友呀？」之後佢兩個互相對望笑一笑，又望住我點下頭咁。唉，再之後既野我就......算了，反正這些機會不再屬於我的。
　 [attach]6065[/attach]
到左今日，我再重回童話，所有好友，族人，什至黑名單人士，通通都無再上線，好感嘆當年有過既回憶。忽然好想同所有玩緊童話既朋友講，無論現實或者係虛擬世界入面，請珍惜每一個相識既緣份，我唔知童話幾時會結束營運，可能係幾個月，或者係幾年，童話呢個平台一結束，我地就會各散東西。所以，唔好比自己後悔！
　

作者: 熊熊 時間: 2013-4-8 04:37:32

真人真事？。

作者: jasoncheung523 時間: 2013-4-8 05:00:51

太精彩v_v...

作者: jelly 時間: 2013-4-8 09:12:16

珍惜現在~~ 愛惜現在~~ (檢討過去~~ 計劃未來~~)

作者: anna1206 時間: 2013-4-12 01:56:30

不碰面,就不會加重思念

作者: lovernami 時間: 2013-4-12 09:57:48

不碰面比較好

作者: siubabykwan 時間: 2013-4-12 19:50:30

好SAD

作者: moonlight0308 時間: 2013-4-12 22:37:19

真人真事...LOL?

作者: sakuraiss 時間: 2013-4-17 21:18:17

真係好想知堅唔堅

作者: 最冷一天 時間: 2013-4-17 21:22:23

haha錯失良機

作者: ballball2013 時間: 2013-4-20 16:16:01

haha完全係真人真事

多謝收看

歡迎光臨 AGAMES 討論區 (http://forum.agames.hk/)