[蘋果] 男生圍：鵬哥扮嘢如浮雲

lamxdxd

一代扮嘢泰斗盧海鵬再顯神功，一段亞視諷刺時弊節目《香港亂噏》的「木村拓杉戒住先」廣告短片，近日熱爆互聯網，點擊率高達 25萬，令鵬哥人氣再升，同時《香港亂噏》亦宣佈加碼做足五晚，威力之大，連鵬哥也始料不及。然而，年輕時已醉心俄國戲劇大師史坦尼斯拉夫斯基著作《演員的自我修養》的鵬哥，其實喜歡演戲多於扮嘢：「始終都係做戲過癮啲，每做完一部戲，自己心中都會有團火。」　撰文：戴彩煥

這天，盧海鵬如常返到大埔亞視總台為晚上直播的《香港亂噏》做準備，在化妝間談起他近日熱爆互聯網的露點木村時，鵬哥也不禁失笑說：「我都唔知㗎，係個女打電話畀我，話我扮木村段片好犀利，有唔知幾多萬人點擊，我話：『乜嘢叫點擊？』原來係啲友喺網上一路點我一路做，點點吓就有幾十萬，咁得意喎。可能啲後生見佢哋偶像俾人搞，覺得好得意咁啦。」可擔心被木村 fans詐型，怪他將偶像醜化，就如早年阮兆祥扮韓國天王 Rain一樣？鵬哥不認同說：「我都冇畫花面，我都化到好靚仔啫。」

愛演戲　心中有團火
由昔日張國榮、羅文、沈殿霞和達明一派等紅星猛人，到今日的露點木村、 o靚模周秀娜，鵬哥的扮嘢功夫也叫人拍案叫絕，笑破肚皮，但鵬哥一再強調自己從來沒有醜化：「模仿最忌係醜化，我唔係醜化，係滑稽咗佢，將佢嘅特性捕捉，然後誇張小小表達。最緊要有嗰個人嘅特性，等觀眾一睇就知道你扮緊邊個。」
鵬哥未入行前已拜讀俄國戲劇大師史坦尼斯拉夫斯基著作《演員的自我修養》，跟國際級影星周潤發是 73年無綫第三期藝員訓練班同學，演過無數正正經經的劇集和電影，但最為人津津樂道的，不是他精湛演技，而是出神入化的扮嘢功夫，對一個演員而言，可有半點遺憾？鵬哥說：「又好難扭轉人哋對你嘅睇法，因為大家睇慣我做《歡樂今宵》，人哋想話正正經經畀個戲你做，都會話：『都係唔好啦，佢好搞笑㗎。』後期杜琪峰都有搵我拍戲㗎，你話收唔收貨？一樣有演技㗎。」扮嘢和演戲，那方面興趣較大？鵬哥不假思索說：「始終都係做戲過癮啲，扮嘢係過眼雲煙，笑吓就算。每做完一部戲，自己心中都會有團火。」  



《扮木村》
盧海鵬在《香港亂噏》中扮木村的片段點擊率已逾 25萬人次。
網址： http://www.youtube.com/watch?v=EvPQMbqpYVA




《扮周秀娜》
膚海鵬最新扮 o靚模周秀娜在街上脫衫點擊率也逾 13萬人次，其實是戒毒宣傳片。
網址： http://www.youtube.com/watch?v=xJ4IRIHvucY





想劈炮　都唔知做乜
扮嘢扮足 30年，鵬哥也曾想過金盆洗手，不再扮鬼扮馬。鵬哥說：「年紀大，好難扮啲後生，淨係面啲肌肉已經唔同晒啦，以前皮光肉滑，家就夾硬做，扮嗰啲重係越嚟越後生。其實我都唔想再搞笑扮嘢，舊年 10月我約滿亞視之後一路冇做，後來亞視專登打電話叫我返嚟，話有個類似台灣中天電視台嘅《全民最大黨》節目，全部都係扮政要，咁我咪返嚟玩吓，初初話做 5集，跟住 8集，然之後又話一至五，又唔只扮政客，仲要扮女人扮 o靚模，好在我身上啲肉都未曾『 dum』。辛苦就辛苦㗎啦，但應承咗人哋，唔通劈炮唔撈咩。其實節目做咗幾集之後，我真係想劈炮，因為返到嚟都唔知做乜，我就冇所謂，你叫我做乜就做乜，但新嗰啲真係唔得，佢哋唔似我咁有經驗，佢哋真係要睇過人點做先至做到，唔係一嚟就可以。」



               
鵬哥扮完「業問」再扮「張學有」，只               鵬哥返廠即時刨劇本，並細心研究角色造型。
用了 5分鐘就變身成功。



未言休　趁仲記得嘢
那麼，拍完《香港亂噏》之後是否決定收山不再扮嘢？鵬哥想了好一會說：「唉，做得咪做囉，搵啲唔辛苦嘅做吓囉，起碼家仲記得嘢，到我自己冇記性就一定退休。我家叫做玩吓，家睇對白睇片，我睇一次排一次就嚟得。有啲人話老人家打麻雀可以動吓腦筋唔好停頓，但如果真係冇記性，打麻雀都救你唔到啦。」  

《香港亂噏》工作流程
時間： 1000
流程：幕後人員開會擬定當晚主題，分配藝員扮嘢角色及寫稿。

時間： 1400
流程：藝員回亞視準備。



            





時間： 1500
流程：為當晚環節預先錄影。

時間： 1800
流程：綵排晚上直播環節。

時間： 1900
流程：放食晚飯

時間： 2000

流程：藝員開始為直播造型化妝整頭，然後入廠對稿排練。




《香港亂噏》首腦鄭偉強（中）與幕前
幕後在節目結束後合照時，盧海鵬已速速換衫鬆人。




時間： 2200
流程：節目直播

時間： 2235
流程：節目完畢


      
鵬哥扮嘢代表作



《最鍾意》
穿上棉襖的鵬哥身縮縮手震震的一聲「吓，你隻馬騮」，儼如黃師傅上身，難怪這個是鵬哥最愛的扮嘢角色。






《最辛苦》
牛高馬大的鵬哥扮大食羅賓可謂難度最高，全程要施展軟骨功將整個人縮起來，鵬哥也自言這是他扮過最辛苦的一次。






《最出名》
《幾許瘋語》扮演瘋漢「羅人」，大熱天時穿乾濕褸赤腳暴走，其蹲地骨及踎公廁景象歷久猶新。





《最搞笑》
扮嘢最高境界就是無分年齡性別， 96年鵬哥在台慶夜扮欣宜，一身兒童裝配高跟鞋，一出場已令肥姐笑到失禁。






《最驚險》
將盧冠廷的《陪着你走》改成《陪着你嘔》，歌詞啜核，最攞命是鵬哥拖住小豬出來，要使勁捉住牠，驚險萬分。




現場直擊
粗口鬧後輩亂爆肚記者前日花上一整天時間到大埔亞視總台直擊《香港亂噏》製作過程，由節目主腦、高級副總裁鄭偉強與監製葉成昌和米惠邦一班幕後開會度橋，到盧海鵬、姜皓文、劉錫賢和林超榮等化妝錄影以致直播，製作部寫字樓、化妝間到錄影廠到處人聲鼎沸，人來人往，感覺死氣沉沉多時的亞視已經歸位回復生氣。   

化妝整頭五分鐘


導演（右一）向吳嘉星（左一）、鵬哥
和秦啟維示範招式，但這部份錄影最後棄用未有出街。



鵬哥前日下午先以一代宗師葉問造型夥拍吳嘉星和秦啟維預錄晚上播映環節，在綵排期間，不時爆肚及爆粗的鵬哥令在場工作人員笑破肚皮；到正式錄影，秦啟維學鵬哥即場爆肚，結果卻爆出個大頭佛，秦啟維指鵬哥趕住開拍新片《葉問大戰李小龍》，氣得鵬哥即場罵道：「 X你 XX，唔好係又爆唔係又爆啦，葉問係李小龍師傅嚟㗎。」事後鵬哥說：「呢啲咪係懶叻囉，講出嚟都俾人笑啦。」之後鵬哥換上張學友造型直播演出，連換衫化妝整頭不超過 5分鐘，就如節目結束後鵬哥速速鬆人般快過閃電。